SYMRE

Med masse energi, høg groovefaktor og sjangerblanding tar Symre opp viktige tema som kjærleik, identitet og politikk.

Symre Taugbøl Bang (23) er ein låtskrivar, gitarist og songar frå Morgedal. Med seg har ho bassist Torjus Gravir Klykken (23) frå Skien og trommeslagar Jon Espelid (25) frå Treungen.

Trioen byr på leikent samspel og personleg formidling. Noko vil vere kjent for elevar på ungdomsskulen, men dei kjem også til å bli introdusert for noko nytt.

Symre har fått tilbakemelding på at dei er finurlege, med fargerik musikk og tekstar som vinglar mellom humor og alvor. Musikksjangeren varierer frå visesong til luftig jazz og rytmisk pop og rock - alt etter kva låtskrivar Symre tenkjer kler teksten best.

I dialog med kvarandre og publikum snakkar musikararne om tekstane; om kjærleik, politikk og identitet, og dei musikalske verkemidla.

Dei unge musikarane trekker òg parallellar til eigne liv. Med det håpar dei konserten blir ekstra relevant, sidan dei sjølve er unge telemarkingar som syng på dialekt.

Tekst til vekeplanen: Den kulturelle skulesekken har invitert Symre til å halde konsert Symre byr på eigne låtar om kjærleik, identitet og politikk.