– Det er givande når vi treffer ein kreativ nerve i fellesskap
Publisert 09.09.2020
Musikar Gisle Haaland og fotograf Thomas Winje Øijord har treft ei elevgruppe som ofte ikkje blir sett i kvardagen, men som responderer med ei openheit dei sjeldan har opplevd.
– Våre beste minne handlar først og framt om elevar som kvir seg for å vere med, som er inneslutta og introverte og som synest det verkar skummelt å skulle eksponere seg gjennom musikk og portrett, men som i løpet av eit par timar blomstrar og involverer seg med fullstendig originale påfunn, energi og store dosar personlegdom!
Tilpassar produksjonen til kvar enkelt
Tomannslaget Gisle og Thomas driv DKS-prosjektet «Eit blikk på kvarandre», ein kunstverkstad som går ut på å lage multimediale gruppeportrett av barn og unge på tilrettelagde avdelingar. Etter at dei utvikla prosjektet i 2013 har dei vore på turné kvart år, frå Finnmark til Sørlandet.
– Gjennom DKS har vi først og fremst treft ei elevgruppe som ofte ikkje blir sett i kvardagen og som evnar å knyte seg til andre menneske med ei openheit vi sjeldan opplever elles, fortel duoen.
Dei jobbar med grupper på inntil seks personar. Portretta består av stop-motion, eigenkomponert musikk, lydlandskap og stillbilete. Dei produserer ein tre minutts video der alt blir sett saman, og avsluttar med ei framvisning på skulen.
![Gruppeportrett med elever.](https://cdn.denkulturelleskolesekken.no/national/2020/09/b9d645d9-et-blikk-på-hverandre.jpg)
– DKS-oppdraget handlar for oss om å møte barn med ei lang rekkje utfordringar og å tilpasse produksjonen vår til kvar enkelt gruppe og elev. Det er vanskeleg, men tilsvarande givande og gledesskapande når vi treffer ein kreativ nerve i fellesskap. I oppdrag utanfor DKS er vi ofte meir «på jobb» og speler eller tek bilete utan å vere i ein direkte og kreativ dialog med publikum eller kundar.
Lang rekkje av minneverdige stunder
I løpet av åra i Den kulturelle skolesekken har Gisle og Thomas opplevd mykje. Og dei innrømmer at det ikkje er alt som er positivt med å vere på turné.
– Våre verste minne handlar som regel om mat, spesielt i dei tilfella vi besøkjer mindre stader og blir sitjande og jobbe så lenge på hotellet at alle restaurantar har stengt når vi endeleg har tid til å ete. Slike netter kan bli lange.
– Når det er sagt, så har vi òg hoppa ned frå tak, klatra opp på bilar, fått servert tre-retters middagar som elevar har laga, blitt invitert med på sortering av reinflokkar i rundgjerder ei mørk natt på Finnmarksvidda, fått fabelaktige kort og teikningar, produsert 3D-portrett i Noregs største 3D-skrivar, gått på raud løpar og drukken sjampanjebrus i stettglas under framvisningar.
– Kva skal vi seie? Det er ei lang rekkje av minneverdige augneblink som stadig overraskar oss!
![Sitat: Våre beste minner handler om elever som kvier seg for å være med, men som i løpet av et par timer blomstrer og involverer seg. - Gisle Haaland og Thomas Winje Øijord](https://cdn.denkulturelleskolesekken.no/national/2020/09/b9d645d9-dksno-thomas-og-gisle.jpg)
Les meir om Gisle, Thomas og prosjektet «Eit blikk på kvarandre» på etblikk.no.
Les kva andre utøvarar seier om å vera på DKS-turné
Toppbilde: Gisle og Thomas holder kunstverksted med portrettfotografering (Foto: etblikk.no)