Utveg

I "Utveg" møter vi Johanne som er 17 år. Ho kan knapt vente til ho er ferdig med skulen, så ho kan flytte frå den vesle bygda, oppleve verda og utdanne seg til psykolog. Foreldra hennar, derimot, har andre planar for henne, dei vil at ho skal overta slektsgarden. I tillegg har bestevenninna, Marte, fått seg kjæraste, og er berre oppteken av han. Johanne blir dregen mot Linn, ei venninne frå barneskulen, som har droppa ut frå skulen og heng med rånarar, folk Johanne elles aldri ville vist deg med, og driv med ting ho vanlegvis ikkje ville gjort.

"Utveg" er ein roman om venskap og dei vala ein må ta for å finne sin eigen veg i livet. Eit viktig stikkord for refleksjonane elevane vil måtte gjere er forventning. Kva forventningar har dei til seg sjølv, kva forventningar kjenner dei på i kvardagen, og kven har forventningar til dei? Korleis kan forventningar vere positive og negative, og korleis påverkar andre sine forventingar til oss måten vi oppfører oss på og dei vala vi tek i liva våre? Sjølv om tematikken i boka er knytt til ei lita bygd, vil desse temaa lett kunne overførast til større byar og andre typar sosiale miljø.