BRAZZ

Med skulekonserten BRAZZ ynskjer The Brazz Brothers å formidle spanande og spesialarrangert musikk frå fleire verdsdelar med den originale besetninga deira, to trompetar, horn, trombone, tuba og trommer. Konserten består av mykje rytmisk musikk kombinert med leiken improvisasjon. Dette er musikarar som er kjende for høg opplevingsfaktor på konsertane!

I løpet av 40 år har dei 6 musikarane i The Brazz Brothers frå Sula på Sunnmøre vore særskilt opptatt av å formidle god, levande musikk for eit breitt publikum. I løpet av desse åra har dei spelt over 900 skulekonsertar over heile verda! For ikkje lenge sidane spelte dei i favelaene i Rio de Janeiro, Brasil.

Siden dei spelar instrumental musikk opplever dei sjeldan «språkproblem», og med ulike arrangører har dei spelt for ulike alderssteg i mellom anna New York, Los Angeles, Sarajevo, Bagamoyo, Maputo, Johannesburg, Cape Town, Bankok, Bejing, Hong Kong, Shanghai, Bosnia, Estland, Litauen, Skottland, England, Sverige, Danmark og Noreg.

På konserten vil musikarane også demonstrere instrumenta sine på utradisjonelt vis, td. gjennom elektronikk, mutar, slangar og liknande. Dei vil også demonstrere korleis seks kuduhorn høyrest ut, ein ur-gammal blåsetradisjon fra Sør-Afrika i tillegg til heseblesende Masaidans frå Tanzania.

Det vert også samspel med publikum (sang, klapp og dans) i heftig «call and response-stil» som ikkje treng særskilt førebuing.